ಬಂಟ್ವಾಳ: ಮಳೆಗಾಲದಲ್ಲಿ ಇದು ತೋಡು, ಬೇಸಿಗೆ ಕಾಲದಲ್ಲಿ ವಾಹನ ಸಂಚಾರಕ್ಕೆ ರಸ್ತೆ. ಇದು ಸಜೀಪ ಮುನ್ನೂರು ಗ್ರಾ.ಪಂ. ವ್ಯಾಪ್ತಿಯ ಆಲಾಡಿ ರಸ್ತೆಯ ಸ್ಥಿತಿ!
ಮಳೆ ಬಂದರೆ ಈ ಭಾಗದ ಜನರು ರಸ್ತೆಯಲ್ಲಿ ಹೋಗುವಂತಿಲ್ಲ.
ರಸ್ತೆಯ ಎರಡು ಬದಿಯಲ್ಲಿ ಮಳೆ ನೀರು ಹರಿದು ಹೋಗಲು ಚರಂಡಿ ವ್ಯವಸ್ಥೆ ಇಲ್ಲದೆ ನೀರು ರಸ್ತೆಯಲ್ಲಿ ನಿಂತು ರಸ್ತೆ ತೋಡಾಗಿ ಮಾರ್ಪಾಡು ಆಗಿದೆ.
ರಸ್ತೆಯಲ್ಲಿ ನಿಂತಿರುವ ನೀರು ಹರಿದುಹೋಗಲು ಜಾಗವಿಲ್ಲದೆ ಸುತ್ತಮುತ್ತಲಿನ ಮನೆಯ ಅಂಗಳದಲ್ಲಿ ನೀರು ಸಂಗ್ರಹವಾಗುತ್ತದೆ.
ಬಳಿಕ ಮನೆಯ ಅಂಗಳದಲ್ಲಿ ಇರುವ ಬಾವಿಗಳಿಗೆ ಕೆಸರು ತುಂಬಿದ ನೀರು ಹಾಗೂ ಕೆಲವು ಮನೆಯ ಬಾವಿಗಳು ಜರಿದುಹೋಗಿದೆ.
ಮನೆಯ ಅಂಗಳದಲ್ಲಿ ನೀರು ಶೇಖರಣೆ ಅಗಿರುವ ಪರಿಣಾಮ ಮನೆಯ ಗೋಡೆಗಳು ಬಿರುಕು ಬಿದ್ದಿದೆ.
ಇದು ಕಳೆದ ಹಲವಾರು ವರ್ಷಗಳ ಸಮಸ್ಯೆ. ಈ ಬಗ್ಗೆ ಸ್ಥಳೀಯರು ಗ್ರಾ.ಪಂ.ಗೆ ದೂರು ನೀಡಿದರೂ ಯಾವುದೇ ಪ್ರಯೋಜನವಾಗಿಲ್ಲ.
ಪ್ರತಿ ವರ್ಷ ಮಳೆಗಾಲದಲ್ಲಿ ಇವರು ಪಡುವ ಕಷ್ಟ ಹೇಳತೀರದು.
ನದಿಯಿಲ್ಲದಿದ್ದರೂ ಕೃತಕ ನೆರೆ ಈ ರಸ್ತೆಯಲ್ಲಿ ಬರುತ್ತದೆ.
ಚರಂಡಿ ಕೆಲಸ ಮಾಡಿದ ಎಸ್.ಡಿ.ಪಿ.ಐ.
ಸಜೀಪ ಮುನ್ನೂರು ಗ್ರಾ.ಪಂ. ವ್ಯಾಪ್ತಿಯಲ್ಲಿ ಸಮಸ್ಯೆಗಳ ಸಾಲು ಸಾಲು… ಸಜೀಪಮುನ್ನೂರು ಗ್ರಾ.ಪಂ.ವ್ಯಾಪ್ತಿಯ ಆಲಾಡಿ ಪರಿಸರದಲ್ಲಿ ಮಳೆಗಾಲದಲ್ಲಿ ನೀರು ಹರಿದು ಹೋಗಲು ಚರಂಡಿ ವ್ಯವಸ್ಥೆ ಇಲ್ಲದೆ ರಸ್ತೆಯ ಮೇಲೆಯೆ ಹರಿದುಹೋಗುತ್ತಿದೆ. ಈ ಹಿನ್ನೆಲೆ ಮುಖ್ಯ ರಸ್ತೆಯ ಬಹುತೇಕ ಅಂದರೆ ವೈಜ್ಞಾನಿಕವಾಗಿ ಚರಂಡಿ ಇದ್ದು ಮಣ್ಣು ಬಿದ್ದು ಹೂಳು ತುಂಬಿಕೊಂಡ ಕಡೆಗಳಲ್ಲಿ ಎಸ್.ಡಿ.ಪಿ.ಐ. ಸಂಘಟನೆ ಸ್ವಂತ ಖರ್ಚಿನಲ್ಲಿ ಜೆ.ಸಿ.ಬಿ. ಬಳಸಿ ಚರಂಡಿಯ ಹೂಳೆತ್ತುವ ಕಾರ್ಯ ನಡೆಸಿತು. ಜೊತೆಗೆ ಶ್ರಮದಾನದ ಮೂಲಕ ಸ್ವಚ್ಚತಾ ಕಾರ್ಯ ನಡೆಸಿದರು.
ಅವೈಜ್ಞಾನಿಕ ಚರಂಡಿ
ಇಂದಿರಾನಗರ ಎಂಬಲ್ಲಿ ನಿರ್ಮಾಣ ಮಾಡಿರುವ ಚರಂಡಿ ಅವೈಜ್ಞಾನಿಕವಾಗಿದ್ದು, ಅದರಲ್ಲಿ ನೀರು ಸರಿಯಾಗಿ ಹರಿದು ಹೋಗುವುದಿಲ್ಲ. ನೀರು ಹರಿದು ಹೋಗದಿದ್ದರೂ ಇದರ ಹೂಳೆತ್ತುವ ಕಾರ್ಯಕ್ಕಾಗಿ ಸಾವಿರಾರು ರೂ. ಖರ್ಚು ಪಂಚಾಯತ್ ಮಾಡುತ್ತಿದೆ. ಜೊತೆಗೆ ಈ ಚರಂಡಿ ನೀರು ಹರಿದು ನದಿ ಸೇರಲು ವ್ಯವಸ್ಥೆ ಇಲ್ಲ. ಖಾಸಗಿ ವ್ಯಕ್ತಿಯೋರ್ವರ ಜಮೀನು ಮೂಲಕ ನೀರು ಹರಿದು ಹೋಗುತ್ತಿದ್ದು, ಪ್ರಸ್ತುತ ಅವರು ನೀರು ಅವರ ಜಮೀನು ಮೂಲಕ ಹರಿದುಹೋಗದಂತೆ ತಡೆ ಹಾಕಿದ್ದಾರೆ.
ಅವರ ಅಡಿಕೆ ಕೃಷಿಗೆ ಈ ನೀರು ನುಗ್ಗಿ ಕೃಷಿ ಹಾನಿಯಾಗುತ್ತದೆ ಎಂಬ ಕಾರಣಕ್ಕೆ ಅವರು ತಡೆ ಮಾಡಿದ್ದು, ಮೋರಿ ಹಾಕಿ ಅದರ ಮೂಲಕ ನೀರು ಹೋಗುವುದಾದರೆ ನನ್ನ ವಿರೋಧವಿಲ್ಲ ಎಂದು ಸ್ಥಳೀಯರು ತಿಳಿಸಿದ್ದಾರೆ. ಪಂಚಾಯತ್ ಮೋರಿ ಹಾಕಿಕೊಟ್ಟರೆ ಇಲ್ಲಿ ನೀರು ಶೇಖರಣೆಗೊಂಡು ರಸ್ತೆಯ ಮೇಲೆ ಹರಿದುಹೋಗುವುದು ತಪ್ಪುತ್ತದೆ ಎಂಬುದು ಸ್ಥಳೀಯರ ಮಾತು.
ಚರಂಡಿಯಲ್ಲಿ ಪೈಪ್ ಲೈನ್
ಮಳೆನೀರು ಹರಿದು ಹೋಗಲು ನಿರ್ಮಾಣ ಮಾಡಿರುವ ಚರಂಡಿಯಲ್ಲಿ ಬಹುಗ್ರಾಮ ಕುಡಿಯುವ ನೀರಿನ ಪೈಪ್ ಲೈನ್ ಅಳವಡಿಕೆ ಮಾಡಿರುವ ಕಾರಣ ನೀರು ಹರಿದು ಹೋಗುವಂತಿಲ್ಲ, ಹೂಳೆತ್ತಲು ಅಲ್ಲಿ ಜಾಗವಿಲ್ಲ ಎಂದು ಸ್ಥಳೀಯರು ಆರೋಪ ವ್ಯಕ್ತಪಡಿಸಿದ್ದಾರೆ.
ಸ್ವಂತ ಖರ್ಚಿನಲ್ಲಿ ಚರಂಡಿ ಕೆಲಸ
ಸಜೀಪ ಮುನ್ನೂರು ಗ್ರಾ.ಪಂ. ವ್ಯಾಪ್ತಿಯ ಆಲಾಡಿ ಗ್ರಾಮದಲ್ಲಿ ಮಳೆ ನೀರು ಹರಿದು ಹೋಗಲು ಸರಿಯಾದ ವ್ಯವಸ್ಥೆ ಇಲ್ಲದೆ ಸಾಂಕ್ರಾಮಿಕ ರೋಗದ ಭಯ ನಿರ್ಮಾಣವಾದ ಹಿನ್ನೆಲೆಯಲ್ಲಿ ನಾವು ಸ್ವಂತ ಖರ್ಚಿನಲ್ಲಿ ಚರಂಡಿಯ ಹೂಳೆತ್ತುವ ಕಾರ್ಯ ನಡೆಸುತ್ತಿದ್ದೇವೆ. ಅದರ ಜೊತೆಗೆ ಶ್ರಮದಾನದ ಮೂಲಕ ಚರಂಡಿಯ ಸುತ್ತ ಸ್ವಚ್ಛ ಕಾರ್ಯ ನಡೆಸಿ ಗ್ರಾ.ಪಂ. ನ ಕಣ್ಣು ತೆರೆಸುವ ಕೆಲಸ ಮಾಡಿದ್ದೇವೆ. ಇನ್ನಾದರೂ ಎಚ್ಚತ್ತುಕೊಂಡು ಈ ಭಾಗದ ಸಮಸ್ಯೆಗಳನ್ನು ಪರಿಹರಿಸಲು ಎಸ್.ಡಿ.ಪಿ.ಐ ಪಕ್ಷದ ಬಂಟ್ವಾಳ ವಿಧಾನಸಭಾ ಕ್ಷೇತ್ರದ ಕಾರ್ಯದರ್ಶಿ ಸಲೀಂ ಆಲಾಡಿ ಒತ್ತಾಯ ಮಾಡಿದ್ದಾರೆ.
