ಬಂಟ್ವಾಳ: ಲಾಕ್ ಡೌನ್ ಹಿನ್ನೆಲೆಯಲ್ಲಿ ಊರಿಗೆ ತೆರಳಲು ಸಾಧ್ಯವಾಗದೆ, ಅನ್ನ ನೀರು ಇಲ್ಲದೆ ಹಸಿವಿನಿಂದ ಊರೂರು ಅಲೆದಾಡುತ್ತಾ ಸಂಕಷ್ಟ ಪಡುತ್ತಿದ್ದ ಮಡಿಕೇರಿಯ ರಾಣಿಪೇಟೆ ನಿವಾಸಿಯೊಬ್ಬರನ್ನು ಇಬ್ಬರು ಪೊಲೀಸರು ಉಪಚರಿಸಿ ಊರಿಗೆ ತಲುಪಿಸಿದ ಮಾನವೀಯ ಸೇವೆಯೊಂದು ನಡೆದಿದೆ.
ಪುತ್ತೂರು ಸಂಟ್ಯಾರು ಚೆಕ್ ಪಾಯಿಂಟ್ ನಲ್ಲಿ ಕರ್ತವ್ಯದಲ್ಲಿದ್ದ ದಯಾನಂದ ಮತ್ತು ಕಿರಣ್ ಮಾನವೀಯತೆ ಮೆರೆದ ಪೊಲೀಸರು.
ಕೆಲಸಕ್ಕೆಂದು ಮಡಿಕೇರಿಯಿಂದ ಮಂಗಳೂರಿಗೆ ಬಂದು ಲಾಕ್ ಡೌನ್ ಪರಿಣಾಮ ಕೆಲಸವೂ ಇಲ್ಲದೆ, ಊರಿಗೆ ಮರಳಲು ಬಸ್ಸಿನ ಸೌಕರ್ಯವೂ ಇಲ್ಲದೆ ಆ ವ್ಯಕ್ತಿ ಮಂಗಳೂರಿನಿಂದ – ಮಡಿಕೇರಿಗೆ ನಡೆದುಕೊಂಡು ತೆರಳುತ್ತಿದ್ದರು.
ಎರಡು ದಿನಗಳಿಂದ ಊಟ ಮಾಡದೆ ರಸ್ತೆಯಲ್ಲಿ ನಡೆಯುತ್ತಿದ್ದ ಆ ವ್ಯಕ್ತಿ ಹಸಿವು ನೀಗಿಸಲು ರಸ್ತೆ ಬದಿಯಲ್ಲಿ ಸಿಕ್ಕಿದ ಆಹಾರಗಳನ್ನು ತಿನ್ನುತ್ತಿದ್ದರು.
ಈ ವ್ಯಕ್ತಿಯ ಬಗ್ಗೆ ಪತ್ರಕರ್ತರೊಬ್ಬರಿಂದ ಮಾಹಿತಿ ತಿಳಿದ ಪುತ್ತೂರು ಸಂಟ್ಯಾರು ಚೆಕ್ ಪಾಯಿಂಟ್ ಕರ್ತವ್ಯದಲ್ಲಿದ್ದ ಠಾಣಾ ಸಿಬ್ಬಂದಿ HC 508ನೇ ದಯಾನಂದ ಹಾಗೂ HG 461 ನೇ ಕಿರಣ್ ರವರು ಕೂಡಲೇ ಸ್ಪಂದಿಸಿ ಹಸಿವಿನಿಂದ ಕಂಗಾಲಾಗಿದ್ದ ಆ ವ್ಯಕ್ತಿಗೆ ತಮಗಾಗಿ ಮನೆಯಿಂದ ತಂದಿದ್ದ ಮಧ್ಯಾಹ್ನದ ಊಟವನ್ನು ನೀಡಿ ಉಪಚರಿಸಿದ್ದಾರೆ.
ನಂತರ ಒಂದು ವಾಹನದಲ್ಲಿ ಆ ವ್ಯಕ್ತಿಯನ್ನು ಹತ್ತಿಸಿ ಮಡಿಕೇರಿಗೆ ಕಳುಹಿಸಿಕೊಟ್ಟಿರುತ್ತಾರೆ. ಲಾಕ್ ಡೌನ್ ನಂತಹ ಸಂಕಷ್ಟ ಸಮಯದಲ್ಲಿ ತಮ್ಮ ಕರ್ತವ್ಯದೊಂದಿಗೆ ಮಾನವೀಯತೆಯನ್ನು ಮೆರೆದ ಈ ಸಿಬ್ಬಂದಿಗಳ ಕಾರ್ಯ ಪ್ರಶಂಸೆಗೆ ಪಾತ್ರವಾಗಿದೆ.
