ಮುಂಬೈ: ಮುಂಬೈ ಯ 18 ದಿನದ ಹಸುಗೂಸು ಮಾರಕ ಕೊರೋನಾ ವೈರಸ್ ಅನ್ನು ಸೋಲಿಸಿ ಗುಣವಾಗಿ ಹೀರಾನಂದಾನಿ ಆಸ್ಪತ್ರೆಯಿಂದ ಗುರುವಾರ ಬಿಡುಗಡೆಯಾದ ಬಗ್ಗೆ ಮಾಧ್ಯಮದ ವರದಿ ತಿಳಿಸಿದೆ.
ಆದ್ದರಿಂದ ದೇಶದಲ್ಲಿ ಹರಡುತ್ತಿರುವ ಮಾರಣಾಂತಿಕ ವೈರಸ್ ನಿಂದ ಗುಣಮುಖ ಹೊಂದಿದ ಅತೀ ಕಿರಿಯ ರೋಗಿ ಎಂದು ವೈದ್ಯರು ತಿಳಿಸಿದ್ದಾರೆ. ಮಗುವಿನ ತಾಯಿ ಕೋವಿಡ್ ವೈರಸ್ ವರದಿ ನೆಗೆಟಿವ್ ಬಂದಿರುವುದು ಅಚ್ಚರಿಯ ವಿಷಯ.
ವೈದ್ಯರ ಹೇಳಿದಂತೆ, ಮೇ 10ರಂದು ಖಾಸಗಿ ನರ್ಸಿಂಗ್ ಹೋಮ್ ನಲ್ಲಿ ಮಹಿಳೆ ಮಗುವಿಗೆ ಜನ್ಮ ನೀಡಿದ್ದರು. ಮಗು ಹುಟ್ಟಿದ 3ಗಂಟೆಯಲ್ಲಿಯೇ ಮಗುವಿಗೆ ವಿಪರೀತ ಜ್ವರ ಕಾಣಿಸಿಕೊಂಡಿತ್ತು. ಕೂಡಲೇ ಮಗುವನ್ನು ಮತ್ತೊಂದು ಆಸ್ಪತ್ರೆಗೆ ಸ್ಥಳಾಂತರಿಸಿ ಪರೀಕ್ಷಿಸಿದಾಗ ಕೋವಿಡ್ 19 ವೈರಸ್ ಪತ್ತೆಯಾಗಿತ್ತು.
ಮೇ 12ರಂದು ಹೀರಾನಂದಾನಿ ಆಸ್ಪತ್ರೆಗೆ ಹೆಣ್ಣು ಮಗುವನ್ನು ಸ್ಥಳಾಂತರಿಸಿ ಕೋವಿಡ್ 19 ವೈರಸ್ ಗೆ ಚಿಕಿತ್ಸೆ ನೀಡಲಾಗಿತ್ತು. ಮಗುವನ್ನು ಆಸ್ಪತ್ರೆಗೆ ದಾಖಲಿಸಿದಾಗ ವಿಪರೀತ ಜ್ವರ ಮತ್ತು ಉಸಿರಾಟದ ತೊಂದರೆ ಅನುಭವಿಸುತ್ತಿತ್ತು ಎಂದು ಹೇಳಿದ್ದಾರೆ. ಪುಟ್ಟ ಮಗುವನ್ನು ಉಪಕರಣ ರಹಿತ ವೆಂಟಿಲೇಶನ್ ನಲ್ಲಿ ಇರಿಸಲಾಗಿತ್ತು. ಚಿಕಿತ್ಸೆಯ ಬಳಿಕ ಮಗುವನ್ನು ಮೇ 28ರಂದು (ಇಂದು) ಪರೀಕ್ಷಿಸಿದಾಗ ನೆಗೆಟಿವ್ ವರದಿ ಬಂದಿತ್ತು.
ನಂತರ ಇಂದು 18 ದಿನದ ಮಗುವನ್ನು ಆಸ್ಪತ್ರೆಯಿಂದ ಡಿಸ್ಚಾರ್ಜ್ ಮಾಡಲಾಗಿದೆ ಎಂದು ಡಾ. ಬಿಜಾಲ್ ಶ್ರೀವಾಸ್ತವ್ ತಿಳಿಸಿದ್ದಾರೆ.
