ವಿಟ್ಲ: ರೇಬಿಸ್ ಮಾರಣಾಂತಿಕ ಕಾಯಿಲೆಯಾಗಿದ್ದು ನಾಯಿಗಳಿಂದ ನಾಯಿಗೆ, ಇತರ ಪ್ರಾಣಿಗಳಿಗೆ, ಹರಡುವ ಕಾಯಿಲೆಯಾಗಿದೆ. ಈ ನಿಟ್ಟಿನಲ್ಲಿ ಪ್ರತೀ ವರ್ಷವು ನಾಯಿಗಳಿಗೆ ರೇಬಿಸ್ ಲಸಿಕೆಯನ್ನು ನೀಡುವುದು ಅವಶ್ಯವಾಗಿರುತ್ತದೆ. ಈ ನಿಟ್ಟಿನಲ್ಲಿ ಇಡ್ಕಿದು ಗ್ರಾಮ ಪಂಚಾಯಿತಿಯಲ್ಲಿ ನಿರಂತರವಾಗಿ ಪ್ರತೀ ವರ್ಷವು ರೇಬಿಸ್ ಲಸಿಕಾ ಶಿಬಿರವನ್ನು ನಡೆಸಿಕೊಂಡು ಬರುತ್ತಿದ್ದು ರಾಜ್ಯ ಮಟ್ಟದಲ್ಲಿಯೇ ಗುರುತಿಸಲ್ಪಟ್ಟಿದೆ ಎಂದು ದ.ಕ ಪಶು ಪಾಲನಾ ಇಲಾಖೆ ಉಪನಿರ್ದೆಶಕ ಡಾ.ಪ್ರಸನ್ನ ಕುಮಾರ್ ಹೇಳಿದರು.
ಅವರು ನಾಯಿಗಳಿಗೆ ಇಡ್ಕಿದು ಗ್ರಾ.ಪಂ. ನಲ್ಲಿ ರೇಬೀಸ್ ಚುಚ್ಚುಮದ್ದು ನೀಡುವ ಕಾರ್ಯಕ್ರಮ ಉದ್ಘಾಟಿಸಿ ಮಾತನಾಡಿದರು.
ಇಡ್ಕಿದು ಗ್ರಾ.ಪಂ.ನಲ್ಲಿ ನಿರಂತರವಾಗಿ ೨೫ ವರ್ಷಗಳಿಂದ ಲಸಿಕಾ ಕಾರ್ಯಕ್ರಮವನ್ನು ಸೇವಾ ಸಂಸ್ಥೆಗಳ ಸಹಕಾರದೊಂದಿಗೆ ನಡೆಸಿಕೊಂಡು ಬರುತ್ತಿದ್ದು ಈ ಬಗ್ಗೆ ಪಶು ವೈದ್ಯಾಧಿಕಾರಿ ಡಾ.ಕೃಷ್ಣಭಟ್ ಕೋಂಕೋಡಿ ಅವರು ಮಾಹಿತಿ ನೀಡಿದರು.
ಈ ಸಂದರ್ಭದಲ್ಲಿ ರೇಬಿಸ್ ಬಗ್ಗೆ ಮಾಹಿತಿಯನ್ನು ಒಳಗೊಂಡು, ಮುಂದಿನ ಲಸಿಕಾ ದಿನಾಂಕವನ್ನು ಸೂಚಿಸುವ ಲಸಿಕಾ ಕಾರ್ಡ್‌ನ್ನು ಬಿಡುಗಡೆಗೊಳಿಸಲಾಯಿತು ಮತ್ತು ಶ್ವಾನಗಳ ಮಾಲಕರಿಗೆ ನೀಡಲಾಯಿತು.
ಗ್ರಾಮ ಪಂಚಾಯಿತಿ ವ್ಯಾಪ್ತಿಯ ೨೪ ಕೇಂದ್ರಗಳಲ್ಲಿ ಶಿಬಿರವನ್ನು ಹಮ್ಮಿಕೊಂಡಿದ್ದು ೫೦೦ ನಾಯಿಗಳಿಗೆ ಚುಚ್ಚುಮದ್ದು ನೀಡಲಾಯಿತು. ಬಂಟ್ವಾಳ ಮುಖ್ಯ ಪಶುವೈದ್ಯಾಧಿಕಾರಿ ಡಾ.ಅವಿನಾಶ್ ಭಟ್, ವಿಟ್ಲ ಮುಖ್ಯ ಪಶುವೈದ್ಯಾಧಿಕಾರಿ ಡಾ.ಪರಮೇಶ್ವರ ನಾಯ್ಕ, ಜಾನುವಾರು ಅಭಿವೃದ್ದಿ ಅಧಿಕಾರಿಗಳಾದ ಕೃಷ್ಣಮೂರ್ತಿಜಿ, ವಿಟ್ಲ ಹಿರಿಯ ಪಶು ವೈದ್ಯಕೀಯ ಪರೀಕ್ಷಕರುಗಳಾದ ಈಶ್ವರ ಭಟ್, ಶ್ರೀಮಂದಾರ ಜೈನ್, ಬಾಲಕೃಷ್ಣ, ಕಿಶೋರ್ ಚುಚ್ಚುಮದ್ದು ನೀಡಿ ಸಹಕರಿಸಿದರು.
ಕಾರ್ಯಕ್ರಮದಲ್ಲಿ ಪಂಚಾಯಿತಿ ಅಧ್ಯಕ್ಷರಾದ ಎಂ.ಸುಧೀರ್ ಕುಮಾರ್ ಶೆಟ್ಟಿ ಮಿತ್ತೂರು ಸ್ವಾಗತಿಸಿದರು. ತಾಲೂಕು ಪಂಚಾಯಿತಿ ಸದಸ್ಯರಾದ ವನಜಾಕ್ಷಿ ಎಸ್. ಭಟ್, ಪಂ.ಉಪಾಧ್ಯಕ್ಷರಾದ ಯಶೋದ, ಸದಸ್ಯರುಗಳಾದ ಚಿದಾನಂದ ಪೆಲತ್ತಿಂಜ, ಪ್ರಶಾಂತ, ಮೋಹಿನಿ, ಪದ್ಮನಾಭ, ಪುರುಷೋತ್ತಮ, ಸಂಜೀವ ದರ್ಬೆ, ರಮೇಶ ಪೂಜಾರಿ, ತಿಲಕ್‌ರಾಜ್ ಶೆಟ್ಟಿ, ಭಾಗೀರಥಿ, ಪುಷ್ಪ, ಜಯಂತಿ, ಗೀತಾಂಜಲಿ, ಇ.ಸೇ.ಸ.ಸಂಘದ ಮು.ಕಾ.ನಿ.ಅಧಿಕಾರಿ ಈಶ್ವರ ನಾಯ್ಕ, ನಾನಾ ಸಹಕಾರ ಸಂಘದ ಪದಾಧಿಕಾರಿಗಳು, ಮಾಜಿ ಸದಸ್ಯರುಗಳು, ಗ್ರಾಮಸ್ಥರು ಉಪಸ್ಥಿತರಿದ್ದರು . ಪಿಡಿಒ ಗೋಕುಲ್‌ದಾಸ್ ಭಕ್ತ ವಂದಿಸಿದರು. ಲೆಕ್ಕ ಸಹಾಯಕಿ ರಾಜೇಶ್ವರಿ, ಸಿಬ್ಬಂದಿಗಳಾದ ಸೂರಪ್ಪ, ಭವ್ಯ, ಸುನೀತಾ, ಸಾವಿತ್ರಿ, ಪೂರ್ಣಿಮಾ ಕೇಂದ್ರಗಳಲ್ಲಿ ಚುಚ್ಚುಮದ್ದು ನೀಡಲು ಸಹಕರಿಸಿದರು.
