ಬಂಟ್ವಾಳ: ಕಳೆದ ೫ ವರ್ಷಗಳಲ್ಲಿ ಕ್ಷೇತ್ರದ ಜನತೆಗೆ ನೀಡಿದ ಎಲ್ಲಾ ಭರವಸೆಗಳನ್ನು ಈಡೇರಿಸುವ ಕಾರ್ಯ ಮಾಡಿದ್ದು, ಪುದು ಗ್ರಾ.ಪಂ.ನಲ್ಲಿ ಕಾಂಗ್ರೆಸ್ ಪಕ್ಷ ಮುಂದೆಯೂ ಜನಪರ ಆಡಳಿತ ನೀಡಲಿದ್ದು, ದ್ವೇಷದ ರಾಜಕಾರಣ ಎಂದೂ ಕಾಂಗ್ರೆಸ್ ಒಪ್ಪುವುದಿಲ್ಲ ಎಂದು ವಿಧಾನಸಭಾ ವಿಪಕ್ಷ ಉಪನಾಯಕ, ಶಾಸಕ ಯು.ಟಿ.ಖಾದರ್ ಹೇಳಿದರು.
ಅವರು ಫರಂಗಿಪೇಟೆಯಲ್ಲಿ ಕಾಂಗ್ರೆಸ್ ಪ್ರಜಾಧ್ವನಿ ಯಾತ್ರೆ, ಪುದು ಗ್ರಾ.ಪಂ.ಚುನಾವಣೆಯ ವಿಜೇತ ಕಾಂಗ್ರೆಸ್ ಬೆಂಬಲಿತರಿಗೆ ಸದಸ್ಯರು ಹಾಗೂ ಮತದಾರರಿಗೆ ಅಭಿನಂದನಾ ಸಮಾರಂಭದಲ್ಲಿ ಮಾತನಾಡಿದರು.
ವಿಧಾನ ಪರಿಷತ್ ಸದಸ್ಯ, ದ.ಕ.ಜಿಲ್ಲಾ ಕಾಂಗ್ರೆಸ್ ಅಧ್ಯಕ್ಷ ಕೆ.ಹರೀಶ್ ಕುಮಾರ್ ಮಾತನಾಡಿ, ಪುದು ಗ್ರಾ.ಪಂ.ನಲ್ಲಿ ೨೧ ಸ್ಥಾನಗಳನ್ನು ಮೂಲಕ ಪುದು ಮತ್ತೆ ಕಾಂಗ್ರೆಸ್ ನ ಭದ್ರಕೋಟೆ ಎಂದು ಸಾಭೀತು ಪಡಿಸಿದ್ದೀರಿ. ಕಾರ್ಯಕರ್ತರು ಹಗಲಿರುಳು ಶ್ರಮಿಸಿ ಗೆಲ್ಲಿಸಿಕೊಟ್ಟಿದ್ದು, ಶಾಸಕರು ಸೇರಿದಂತೆ ಎಲ್ಲರಿಗೂ ಜಿಲ್ಲಾ ಕಾಂಗ್ರೆಸ್ ನಿಂದ ಕೃತಜ್ಞತೆ ಅರ್ಪಿಸುತ್ತೇನೆ ಎಂದರು.
ವಿಧಾನ ಪರಿಷತ್ ಸದಸ್ಯ ಡಾ. ಮಂಜುನಾಥ ಭಂಡಾರಿ ಮಾತನಾಡಿ, ಬಿಜೆಪಿಯು ಭಾವನಾತ್ಮಕ ಹೇಳಿಕೆಗಳ ಮೂಲಕ ಜನತೆಯ ಮನಸ್ಸನ್ನು ಕೆಡಿಸುವ ಕಾರ್ಯ ಮಾಡಿದ್ದು, ಆದರೆ ಕಾಂಗ್ರೆಸ್ ಯಾವುದೇ ಸುಳ್ಳು ಹೇಳದೆ ಪ್ರಣಾಳಿಕೆಯ ಗ್ಯಾರಂಟಿ ಕಾರ್ಯಕ್ರಮಗಳನ್ನು ಮನದಟ್ಟು ಮಾಡುವ ಕಾರ್ಯವನ್ನು ಮಾಡಬೇಕು. ಕಾಂಗ್ರೆಸ್ ನ ಋಣವನ್ನು ತೀರಿಸುವ ಸಮಯ ಬಂದಿದ್ದು, ಕಾರ್ಯಕರ್ತರು ಗ್ಯಾರಂಟಿಯ ಪ್ರಣಾಳಿಕೆ ಜನರಿಗೆ ತಿಳಿಸುವ ಕಾರ್ಯ ಮಾಡಬೇಕು ಎಂದರು.
ಕೆಪಿಸಿಸಿ ವಕ್ತಾರ ಸುಧೀರ್ ಕುಮಾರ್ ಮುರೊಳ್ಳಿ ಮಾತನಾಡಿ, ಮುಂದಿನ ಚುನಾವಣೆಯು ಕಾಂಗ್ರೆಸ್ ಗೆ ಅಲ್ಲಾ ಹಾಗೂ ರಾಮ ಆಶೀರ್ವಾದ ಮಾಡುವ ಚುನಾವಣೆಯಾಗಿದೆ. ನಾವು ಭಕ್ತಿಯಿಂದ ಆರಾಧಿಸುವ ಶ್ರೀ ಸತ್ಯನಾರಾಯಣ ದೇವರ ಹೆಸರಿನಲ್ಲೂ ಬಿಜೆಪಿ ರಾಜಕೀಯ ಮಾಡಲು ಹೊರಟ್ಟಿದ್ದು, ಜಿಲ್ಲೆಯ ಅಸ್ಮಿತೆಯ ಪ್ರಶ್ನೆಯಾಗಿದ್ದ ಬ್ಯಾಂಕ್ ಮುಳುಗಿಸಿದ ಕೀರ್ತಿ ಬಿಜೆಪಿಗೆ ಸಲ್ಲುತ್ತದೆ ಎಂದರು.
ಜಿಲ್ಲಾ ಕಾಂಗ್ರೆಸ್ ಪ್ರಚಾರ ಸಮಿತಿ ಅಧ್ಯಕ್ಷ ಭರತ್ ಮುಂಡೋಡಿ ಅವರು ಕಾರ್ಯಕರ್ತರನ್ನು
ಉದ್ದೇಶಿಸಿ ಮಾತನಾಡಿದರು. ವೇದಿಕೆಯಲ್ಲಿ ಕೆಪಿಸಿಸಿ ಸದಸ್ಯ ಚಂದ್ರಪ್ರಕಾಶ್ ಶೆಟ್ಟಿ ತುಂಬೆ, ಜಿಲ್ಲಾ ಕಾಂಗ್ರೆಸ್ ಅಲ್ಪಸಂಖ್ಯಾತ ಘಟಕದ ಜಿಲ್ಲಾಧ್ಯಕ್ಷ ಶಾಹುಲ್ ಹಮೀದ್, ಜಿಲ್ಲಾ ಕಾರ್ಮಿಕ ಘಟಕದ ಅಧ್ಯಕ್ಷ ಲಾರೆನ್ಸ್, ಯುವ ಕಾಂಗ್ರೆಸ್ ಮುಂದಾಳು ಸುಹೈಲ್ ಖಂದಕ್, ಪ್ರಮುಖರಾದ ಇಸ್ಮಾಯಿಲ್, ಲತೀಫ್ ಅರಾಫಾ, ಇಮ್ತಿಯಾಜ್ ತುಂಬೆ, ಜಗದೀಶ್ ತುಂಬೆ, ವೃಂದಾ ಪೂಜಾರಿ, ಪ್ರಕಾಶ್ ಬಿ.ಶೆಟ್ಟಿ, ಅಬ್ದುಲ್ ಖಾದರ್, ಸಮೀರ್ ಫಜೀರು, ಮುಸ್ತಫಾ ಹರೇಕಳ, ಸಿದ್ದೀಕ್ ಅಮ್ಮೆಮಾರ್, ಹೈದರ್, ಬಸೀರ್, ಮಜೀದ್ ಫರಂಗಿಪೇಟೆ ಮೊದಲಾದವರು ಉಪಸ್ಥಿತರಿದ್ದರು.
ಜಿ.ಪಂ.ಮಾಜಿ ಸದಸ್ಯ ಉಮ್ಮರ್ ಫಾರೂಕ್ ಅವರು ಪ್ರಸ್ತಾವನೆಗೈದರು. ಗ್ರಾ.ಪಂ.ನ ನೂತನ ಸದಸ್ಯರಾದ ರಮ್ಲಾನ್ ಮಾರಿಪಳ್ಳ, ಲಿಡಿಯಾ ಪಿಂಟೋ, ಇಕ್ಬಾಲ್ ಸುಜೀರ್, ವಿಶುಕುಮಾರ್, ಮಹಮ್ಮದ್ ಮೋನು, ಇಶಾಂ ಫರಂಗಿಪೇಟೆ, ರಿಯಾಝ್ ಕುಂಪನಮಜಲು, ಹುಸೈನ್ ಪಾಡಿ, ಹಾಸೀರ್ ಪೇರಿಮಾರ್, ರಝಾಕ್ ಅಮ್ಮೆಮಾರ್, ಸಾರಮ್ಮ ಇಕ್ಬಾಲ್, ಮಹಮ್ಮದ್ ಅನಸ್, ರಶೀದಾ, ರಹೀನಾ, ಮಮ್ತಾಜ್, ಝೀನತ್, ಜಯಂತಿ, ನೆಬಿಸಾ, ರುಕ್ಸಾನಾ, ಅತಿಕಾ ಅವರನ್ನು ಗೌರವಿಸಲಾಯಿತು.
ಬಂಟ್ವಾಳ ತಾ.ಪಂ.ಮಾಜಿ ಸದಸ್ಯ ಆಸಿಫ್ ಇಕ್ಬಾಲ್ ಸ್ವಾಗತಿಸಿದರು. ಹನೀಫ್ ಗೋಳ್ತಮಜಲು ಕಾರ್ಯಕ್ರಮ ನಿರ್ವಹಿಸಿದರು. ವಂದಿಸಿದರು.
