ಸರಕಾರಿ ಪ್ರಥಮ ದರ್ಜೆ ಕಾಲೇಜು ಸಿದ್ಧಕಟ್ಟೆಯ ಮಹಿಳಾ ಜಾಗೃತಿ ವೇದಿಕೆ ಹಾಗೂ ರೆಡ್‌ಕ್ರಾಸ್ ಘಟಕದ ವತಿಯಿಂದ KFD/H1N1 ಮತ್ತು ಮಹಿಳಾ ಆರೋಗ್ಯ ಜಾಗೃತಿ ಕಾರ್ಯಕ್ರಮ ಜರಗಿತು.
ಈ ಕಾರ್ಯಕ್ರಮಕ್ಕೆ ಸಂಪನ್ಮೂಲ ವ್ಯಕ್ತಿಗಳಾಗಿ ಆಗಮಿಸಿ ಉಪನ್ಯಾಸ ನೀಡಿದ ಆರತಿ ಆರೋಗ್ಯ ಸಹಾಯಕರು ಪ್ರಾಥಮಿಕ ಆರೋಗ್ಯ ಕೇಂದ್ರ ರಾಯಿ ಅವರು ಮಾತನಾಡಿ ಕಾಯಿಲೆಗಳನ್ನು ಬಾರದಂತೆ ತೆಗೆದುಕೊಳ್ಳುವ ಮುನ್ನೆಚ್ಚರಿಕೆಯ ಕ್ರಮಗಳು KFD/H1N1 ತಡೆಗಟ್ಟುವಲ್ಲಿ ಅಗತ್ಯವಾಗಿದೆ. ಈ ಕಾಯಿಲೆಗಳು ಸಾಂಕ್ರಾಮಿಕ ರೋಗಗಳಾಗಿದ್ದು ಇವುಗಳನ್ನು ತಡೆಗಟ್ಟುವಲ್ಲಿ ಜನರಲ್ಲಿ ಜಾಗೃತಿಯ ಅವಶ್ಯಕತೆ ಇದೆ. ಆ ಸಂಬಂಧ ಮಾಹಿತಿಗಾಗಿ ಪ್ರಾಥಮಿಕ ಆರೋಗ್ಯ ಕೇಂದ್ರ, ಗ್ರಾಮ ಪಂಚಾಯತ್ ಹಾಗೂ ಅರಣ್ಯ ಇಲಾಖೆಗಳು ಸರ್ವರ ಸಹಾಯಕ್ಕೆ ಬದ್ಧವಾಗಿವೆ ಎಂದು KFD/H1N1 ರೋಗಗಳ ಸಂಕ್ಷಿಪ್ತ ಮಾಹಿತಿ ನೀಡಿದರು. ಮಹಿಳಾ ಆರೋಗ್ಯದ ಕುರಿತು ಮಾತನಾಡಿದ ಅವರು ಉತ್ತಮ ಜೀವನಕ್ರಮ, ವೈಜ್ಞಾನಿಕ ಆಹಾರ ಕ್ರಮ, ಸ್ವಚ್ಛತೆ ಕಾಪಾಡುವುದು ಇತ್ಯಾದಿಗಳ ಮೂಲಕ ಆರೋಗ್ಯವನ್ನು ಗಳಿಸಬಹುದಾಗಿದೆ. ನಾವು ರೋಗ ನಿರೋಧಕ ಶಕ್ತಿಯನ್ನು ಹೆಚ್ಚಿಸುವಂತ ಆರೋಗ್ಯವನ್ನು ಸೇವಿಸಿ ರೋಗಗಳನ್ನು ಬಾರದಂತೆ ಮುನ್ನೆಚ್ಚರಿಕೆಯ ಕ್ರಮಗಳನ್ನು ಜೀವನದಲ್ಲಿ ಅಳವಡಿಸಿಕೊಳ್ಳಬೇಕು ಎಂದರು.
ಕಾರ್ಯಕ್ರಮದ ಅಧ್ಯಕ್ಷತೆಯನ್ನು ವಹಿಸಿದ್ದ ಕಾಲೇಜಿನ ಪ್ರಾಂಶುಪಾಲರಾಗಿರುವ ಸೌಮ್ಯ ಹೆಚ್.ಕೆ ಇವರು ಮಾತನಾಡಿ ವಿದ್ಯಾರ್ಥಿ ಜೀವನದಲ್ಲಿ ಉತ್ತಮ ಜೀವನಕ್ರಮವನ್ನು ಅಳವಡಿಸಿಕೊಳ್ಳಬೇಕು. ಬೆಳವಣಿಗೆಯ ಹರೆಯವಾದ ಕಾಲೇಜು ಜೀವನದಲ್ಲಿಯೆ ಒಳ್ಳೆಯ ಆಹಾರ ಕ್ರಮವನ್ನು ರೂಢಿಸಿಕೊಂಡು ಮುಂದೆ ಬರಬಹುದಾದ ಆರೋಗ್ಯ ಸಮಸ್ಯೆಗಳನ್ನು ತಡೆಯಬೇಕು. ಸಮಯದ ಅಭಾವದಿಂದ ಮತ್ತು ತೂಕ ನಿಯಂತ್ರಿಸಲು ಇಂದಿನ ಪೀಳಿಗೆಯಲ್ಲಿ ಆಹಾರ ತ್ಯಜಿಸುವುದು ಸಾಮಾನ್ಯವಾಗಿದ್ದು ಇದು ಅನಾರೋಗ್ಯಕ್ಕೆ ದಾರಿಯಾಗುತ್ತಿದೆ. ಆದ್ದರಿಂದ ನಾವು ಸ್ವಚ್ಛ ಪೋಷಕಾಂಶಯುಕ್ತ ಆಹಾರವನ್ನು ಸೇವಿಸಿ ಆರೋಗ್ಯವನ್ನು ರಕ್ಷಿಸಿಕೊಳ್ಳಬೇಕು ಎಂದು ವಿದ್ಯಾರ್ಥಿಗಳಿಗೆ ಕಿವಿಮಾತು ಹೇಳಿದರು.
ಜ್ಞಾನೇಶ್ವರಿ ದ್ವಿತೀಯ ಬಿಕಾಂ ಪ್ರಾರ್ಥಿಸಿ, ಕಾವ್ಯ ತೃತೀಯ ಬಿಎ ಸ್ವಾಗತಿಸಿ, ಮೋಹಿನಿ ದ್ವಿತೀಯ ಬಿಎ ವಂದಿಸಿದ ಕಾರ್ಯಕ್ರಮವನ್ನು ಸ್ವಾತಿ ದ್ವಿತೀಯ ಬಿಎ ನಿರೂಪಿಸಿದರು. ಈ ಕಾರ್ಯಕ್ರಮದಲ್ಲಿ ಕಾಲೇಜಿನ ಎಲ್ಲಾ ಬೋಧಕ ಹಾಗೂ ಬೋಧಕೇತರ ವರ್ಗದವರು ಉಪಸ್ಥಿತರಿದ್ದರು.