ವಿಟ್ಲ: ವಿಟ್ಲ ಮುಸ್ಲಿಂ ಒಕ್ಕೂಟದ ಆಶ್ರಯದಲ್ಲಿ ವಿಟ್ಲ ಹೋಬಳಿಯ ಎಲ್ಲಾ ಮಸೀದಿಗಳ ಪದಾಧಿಕಾರಿಗಳು ಮತ್ತು ಖತೀಬರುಗಳಿಗೆ ಸಿಎಎ, ಎನ್‌ಆರ್‌ಸಿ ಮತ್ತು ಎನ್‌ಸಿಆರ್ ಬಗ್ಗೆ ಮಾಹಿತಿ ಮತ್ತು ತರಬೇತಿ ಶಿಬಿರ ಒಕ್ಕೆತ್ತೂರು ಮಸೀದಿ ಸಭಾಂಗಣದಲ್ಲಿ ನಡೆಯಿತು.
ಸಂಪನ್ಮೂಲ ವ್ಯಕ್ತಿಯಾಗಿ ಆಗಮಿಸಿದ ಜನಪರ ಹೋರಾಟಗಾರ ಡಾ.ಕೃಷ್ಣಮೂರ್ತಿ ಮೈಸೂರು ಅವರು ಶಿಬಿರಾರ್ಥಿಗಳಿಗೆ ಕೇಂದ್ರ ಸರಕಾರದ ಕರಾಳ ಕಾನೂನಿನ ಅಪಾಯದ ಬಗ್ಗೆ ಮಾಹಿತಿ ನೀಡಿ, ಇದನ್ನು ಪ್ರತಿರೋಧಿಸುವ ಸಾಂವಿಧಾನಿಕ ಮಾರ್ಗಗಳ ಬಗ್ಗೆ ತರಬೇತಿ ನೀಡಿದರು. ಹೈಕೋರ್ಟ್ ನ್ಯಾಯವಾದಿ ಅಶ್ರಫ್ ಅಗ್ನಾಡಿ ಪೌರತ್ವ ತಿದ್ದುಪಡಿ ಕಾನೂನಿಂದಾಗುವ ತೊಂದರೆಗಳ ಬಗ್ಗೆ ಮಾಹಿತಿ ನೀಡಿದರು.
ಶಿಬಿರದ ನಂತರ ಮನೆ ಮನೆಗೆ ಸರಕಾರದ ಕಾನೂನಿಗೆ ಬೆಂಬಲ ಕೋರಿ ಬರುವವರಿಗಾಗಿ ’ನಾಳೆ ಬನ್ನಿ’ ಎಂಬ ಪೋಸ್ಟರ್ ಬಿಡುಗಡೆಗೊಳಿಸಲಾಯಿತು.
ಮುಸ್ಲಿಂ ಒಕ್ಕೂಟದ ಅಧ್ಯಕ್ಷ ಅಶ್ರಫ್ ವಿ.ಎಚ್ ಅಧ್ಯಕ್ಷತೆ ವಹಿಸಿದ್ದರು. ಜಿಲ್ಲಾ ಪಂಚಾಯತ್ ಸದಸ್ಯ ಎಂ.ಎಸ್.ಮಹಮ್ಮದ್, ಒಕ್ಕೆತ್ತೂರು ಮಸೀದಿ ಅಧ್ಯಕ್ಷ ಹಮೀದ್ ಲಕ್ಸುರಿ, ಹನೀಫ್ ಖಾನ್ ಕೊಡಾಜೆ, ಖಲಂದರ್ ಪರ್ತಿಪ್ಪಾಡಿ, ಅಬೂಬಕರ್ ಅನಿಲಕಟ್ಟೆ, ಸಿರಾಜ್ ಚೆಂಡುಕಳ, ಮಹಮ್ಮದ್ ಇಕ್ಬಾಲ್ ಹಾನೆಸ್ಟ್, ವಿ.ಕೆ.ಎಂ.ಅಶ್ರಫ್, ವಿ.ಕೆ.ಎಂ,ಹಂಝ, ಅಝೀಝ್ ಹಳೆಮನೆ, ಮಜೀದ್ ಕನ್ಯಾನ, ವಿ .ಎಸ್.ಇಬ್ರಾಹಿಂ, ಜಾಫರ್ ಖಾನ್ ಮೊದಲಾದವರು ಉಪಸ್ಥಿತರಿದ್ದರು.
