Monday, October 23, 2023

ಬೇಗುದಿಯ ಬೆಂಗೊಡ

Must read

ನೆನಪ ಬೇರಿನಾಳದಲೂ
ಬಿಳಲುಗಳ ಹೊಸ ಚಿಗುರು
ಹರಿವ ನೀರ ಚೂಪಿನಲೂ
ಒಡಲ ಕಿಚ್ಚಿನ ಧಗೆಯುರಿಯು

ಬಿಸುಪ ಸುಳಿಗಾಳಿಯಂಚಲೂ
ಇಂಚಿಂಚು ಹನಿವ ಮುಗಿಲು
ಬಿಸಿಲ ನೇತ್ರನ ರಸಾತಳದಲೂ
ನಣ್ಣಗೆ ಸುಂಯ್ಗುಡುವ ತಣ್ಣೆಳಲು

ಎಲ್ಲೆಂದರಲ್ಲಿ ಭೋರ್ಗರೆದು ಧುಮ್ಭಿಕ್ಕಿ
ಒಡಲುರಿಯ ಕಡಲ ದನಿಯಾಗುವ ವಾಂಛೆ
ಕೌಮುದಿಯ ಕಾಂತಿಯಲಿ ಕರಿಮೇಘಗಳ
ರಣಕೇಕೆಗೆ ಕಿತ್ತ ಹರಿದ ಭಾವ ಭಿತ್ತಿ

ಎಲ್ಲೆಂದರಲ್ಲಿ ಬುಸುಗುಡುವ ಕಾಳಿಂಗ
ಮರ್ದನದ ಗೋರಿಯಲೂ ಬಾಡಿದ ಹೂವು
ಹೀಗೆ ನರ ನಾಡಿಗಳಲೆಲ್ಲ ನಿತ್ಯ ನರಕದ
ಕೀವುದುಂಬಿದ ಗುಳ್ಳೆಗಳ ನಿಲ್ಲದ ಬಸಿರು

ಬೆಕ್ಕಸ ಬೆರಗಾದ ಬಯಲಲೂ
ಇಳೆಯ ಆರ್ತನಾದದ ಅಳಲು
ಹೇ ದೇವ, ನಿನ್ನುಪಟಳಕೆ ಬೆದರಿ
ಬೆಂಗಾಡಾದ ಎದೆಯಲಿ ನಿಲ್ಲದ ಏದುಸಿರು

 

#ನೀ.ಶ್ರೀಶೈಲ ಹುಲ್ಲೂರು

More articles

Latest article