Tuesday, October 17, 2023

ಮಾಡರ್ನ್ ಕವನ-ಕೀ ಸಿಗಬಹದೇ

Must read

ವಾಕಿಂಗ್ ಹೋಗಿ
ಬಂದಾಗ ಮನೆ ಕೀ ಇಲ್ಲ
ಹುಡುಕಾಡಿ ಸುಸ್ತಾಗಿ
ಮತ್ತೆ ವಾಕಿಂಗ್
ಹೋಗಿ ಬಂದ ದಾರಿಗೆ
ಕಣ್ಹಾಯಿಸುತ್ತ ಸಾಗಿದೆ..

ಕಣ್ಣುಗಳಿಗೆ ಕಾಣ ಸಿಕ್ಕಿದ್ದು
ಚಾಕಲೇಟ್ ಪ್ಲಾಸ್ಟಿಕ್ ಗಳು
ಅಂದು ಹತ್ತು ಪೈಸೆಯ ಚಾಕಲೇಟ್ ನಿಂದ
ಹಿಡಿದು
ಇಂದಿನ ನೂರು ಇನ್ನೂರು
ಬೆಲೆಯ ಚಾಕಲೇಟ್ ಪ್ಲಾಸ್ಟಿಕ್ ಇತ್ತು
ಕೆಲವು
ಅರ್ಧ ಮಣ್ಣಲ್ಲಿ ಕರಗಿತ್ತು
ಇನ್ನೂ ಕೆಲವು ಹಾಗೆ ಇತ್ತು
ಆ ಸಿಲ್ವರ್ ಬಣ್ಣ
ನನ್ನ ಕೀಯೇನೋ ಅನ್ನುವಂತಾಗಿ
ಬಗ್ಗಿ ಪರೀಕ್ಷಿಸುವಂತೆ ಮಾಡುತ್ತಿತ್ತು..

ಅಲ್ಲೊಂದು ಇಲ್ಲೊಂದು
ಮಿನರಲ್ ವಾಟರ್ ಡಬ್ಬ
ಅದೇನೋ ಫ್ಯಾಂಟಾ,ಮಾಜಾ
ಪೆಪ್ಸಿ ,ಕೋಕೊ ಕೋಲ
ಹೀಗೆ ಕೆಲವು ಹೆಸರಿನ ಬಾಟಲಿಗಳು
ಲೇಸ್, ಕುರ್ಕುರೆ,
ಬಿಸ್ಕತ್ತ್ ಪ್ಯಾಕೆಟ್ಗಳು..
ಕೆಲವು ಮಣ್ಣು ಮೆತ್ತಿಕೊಂಡಿದ್ದವು
ಇನ್ನೂ ಕೆಲವು ಹೊಸತಂತಿತ್ತು..

ಈ ಗುಟ್ಕಾ ಕವರ್ಗಳಂತು
ಅಲ್ಲಲ್ಲಿ ಬಿದ್ದಿದ್ದವು
ಅವುಗಳ ಹೆಸರು ತಿಳಿದದ್ದೇ ಆಗ
ಸಿದ್ದು,ಮಾರುತಿ,ವಿಮಲ್
ಕೂಲ್ ಲಿಪ್,ಮಧು
ಏನೆಲ್ಲಾ ಹೆಸರು..
ಅವುಗಳು ಅಷ್ಟೇ
ಹಳೇ ಚಂದ ಚಿತ್ರಗಳಿಂದ ಹಿಡಿದು
ಇಂದಿನ ಕ್ಯಾನ್ಸರ್ ಬಾಯಿ ತನಕದ
ಚಿತ್ರಗಳ ಪ್ಲಾಸ್ಟಿಕ್ ಗಳು
ಹಾಗೆ ಇದ್ದುವು..!

ಹೋದ ದಾರಿಗೆ ಸುಂಕ ಇಲ್ಲ
ಎಂಬಂತೆ ಸುಸ್ತಾಗಿ
ಕೂತಾಗ ಕುಂಡೆಗೆ ಚುಚ್ಚಿದಂತಾಗ
ನೆನಪಾದದ್ದು
ಹಿಂದಿನ ಕಿಸೆಯಲ್ಲಿ ಇಟ್ಟದ್ದು
ಆ ಕಿಸೆ ಬಿಟ್ಟು
ಬೇರೆ ಎಲ್ಲಾ ಕಡೆ ಹುಡುಕಿದ್ದು..

ಸಿಕ್ಕಿತು
ಮನೆಯ ಕೀ..
ಸಿಗಬಹುದೇ
ಪ್ಲಾಸ್ಟಿಕ್ ಬಂದ್ ಮಾಡುವ ಕೀ..!?

 

✍ಯತೀಶ್ ಕಾಮಾಜೆ

More articles

Latest article