ಬಂಟ್ವಾಳ: ನೋಡಲು ಮನೆಯಂತೆ ಕಾಣುತ್ತದೆ ಆದರೆ ಮನೆಯೊಳಗೆ ಕಾಲಿಟ್ಟರೆ ಹಾವಿನ ಹುತ್ತಗಳು ಬೆಳೆದಿದೆ, ಮೇಲೆ ನೋಡಿದರೆ ಆಕಾಶ ಕಾಣುತ್ತದೆ, ಕೆಳಗೆ ಮಣ್ಣಿನ ನೆಲ , ಯಾವಾಗ ಮೈಮೇಲೆ ಬೀಳುತ್ತೆ ಅನ್ನುವ ಭಯ, ಆದರೆ ಭಯದ ನಡುವೆಯೂ ಬದುಕುವ ಆಸೆ.
ಇದು ಸಜೀಪಮುನ್ನೂರು ಗ್ರಾಮದ ನಾಗನವಳಚ್ಚಿಲ್ ಎಂಬಲ್ಲಿ ವಾಸ ವಾಗಿರುವ ತಾಯಿ ಮತ್ತು ಮಗನ ಮುರುಕಲು ಮನೆಯ ಕಥೆ.
ನಾಗನವಳಚ್ಚಿಲ್ ನಿವಾಸಿ ಕಮಲಾಕ್ಷಿ ಹಾಗೂ ಅವರ ಪುತ್ರ ಜಯಪ್ರಕಾಶ್ ಈ ಮನೆಯಲ್ಲಿ ವಾಸವಾಗಿದ್ದು ತೀರಾ ಬಡತನದ ಜೀವನ ಇವರದು.
ಇಂತಹ ಧಯನೀಯ ಪರಿಸ್ಥಿತಿಯಲ್ಲಿ ವಾಸಿಸುತ್ತಿರುವ ಕುಟುಂಬದ ಬಗ್ಗೆ ಬೆಳಕು ಚೆಲ್ಲುವ ಬಗ್ಗೆ ಈ ವರದಿ.
ಈ ಮನೆಯ ಮೇಲ್ಛಾವಣಿ ಕುಸಿದು ಬಿದ್ದು ಮನೆಯೇ ಕುಸಿಯುವ ಭೀತಿಯಲ್ಲಿದೆ.
ಪ್ರಸ್ತುತ ಹಂಚುಗಳು ಬಿದ್ದು ಹೋಗಿದ್ದು ಅರ್ಧ ಉಳಿದ ಮೇಲ್ಚಾವಣಿಗೆ ಟರ್ಪಾಲು ಮುಚ್ಚಲಾಗಿದ್ದು, ಆದು ಹರಿದಿದೆ. ಮಳೆ ಬಂದರೆ ನೀರು ಮನೆಯೊಳಗೆ ಬೀಳುತ್ತದೆ ಎಂಬ ಚಿಂತೆ ಅವರದ್ದು,
ಗಂಡನನ್ನು ಕಳೆದಕೊಂಡು ಮಗನ ಜವಬ್ದಾರಿ ಕಮಲಾಕ್ಷಿ ಅವರ ಹೆಗಲಿಗೆ ಬಿದ್ದಾಗ , ಅವರು ಬೀಡಿ ಸುತ್ತಿ ಜೀವನ ಮಾಡುತ್ತಾ ಜೊತೆಗೆ ಮಗನಿಗೆ ವಿದ್ಯಾಭ್ಯಾಸ ನೀಡಿದರು. ಅ ಬಳಿಕ ದುಡಿಯಲು ಶಕ್ತಿ ಯಿಲ್ಲದ ತಾಯಿಯನ್ನು ಸಾಕಬೇಕಾದ ಹೊಣೆ ಮಗನ ಮೇಲೆ ಬಿತ್ತು.
ಜಯಪ್ರಕಾಶ್ ಅವರು ಸಮರ್ಪಕ ಕೆಲಸವಿಲ್ಲದೆ, ಸಣ್ಣ ಪುಟ್ಟ ಕೆಲಸಕ್ಕೆ ಹೋಗುತ್ತಾರೆ. ಇವರ ದುಡಿಮೆ ಮನೆ ನಿರ್ವಹಣೆಗೆ ಮಾತ್ರ ಸಾಲುತ್ತಿದ್ದು, ಮನೆಯ ದುರಸ್ತಿ ಕಾರ್ಯ ಮಾಡುವುದು ಇವರ ದುಡಿಮೆಯಿಂದ ಸಾಧ್ಯವಾಗಿಲ್ಲ.
ಮೇಲಿಂದ ನೋಡುವಾಗ ಮನೆ ಸುಸ್ಥಿತಿಯಲ್ಲಿ ಕಂಡರೂ, ಒಳಭಾಗಕ್ಕೆ ನೋಡಿದರೆ ಮನೆಯ ದಯನೀಯ ಸ್ಥಿತಿಯ ಅರಿವಾಗುತ್ತದೆ. ಮನೆಯ ಹಿಂಭಾಗ ಒಳಗಡೆಯೇ ಹುತ್ತ ಬೆಳೆದಿದ್ದು, ಅದನ್ನು ನೋಡುವಾಗಲೇ ಹೆದರಿಕೆ ಹುಟ್ಟುತ್ತದೆ. ಮಳೆ ಗೋಡೆಗಳು ಮಣ್ಣಿನ ಗೋಡೆಗಳಾಗಿದ್ದು, ಮಳೆ ಸುರಿದು ನೀರು ನುಗ್ಗಿದ್ದರೆ ಗೋಡೆಗಳು ಕೂಡ ಬೀಳುವ ಅಪಾಯವಿದೆ.
ಮನೆಯ ಅವ್ಯವಸ್ಥೆಯ ಕುರಿತು ಸಂಬಂಧಪಟ್ಟ ಗ್ರಾ.ಪಂ., ಸ್ಥಳೀಯ ದಾನಿಗಳಿಗೂ ಮನವಿ ಮಾಡಿರುವುದಾಗಿ ಮನೆಯವರು ತಿಳಿಸಿದ್ದು, ಈ ಕುರಿತು ತತ್ಕ್ಷಣ ಕ್ರಮಕೈಗೊಳ್ಳಬೇಕಿದೆ. ಕಳೆದ ಹಲವು ದಶಕಗಳಿಂದ ಇವರಿಬ್ಬರು ಇದೇ ಮನೆಯಲ್ಲಿ ವಾಸಿಸುತ್ತಿದ್ದು, ದುರಸ್ತಿ ಮಾಡುವುದು ನಮ್ಮಿಂದ ಸಾಧ್ಯವಾಗಿಲ್ಲ ಎಂದು ಕಮಲಾಕ್ಷಿಯವರು ಅಭಿಪ್ರಾಯಿಸುತ್ತಾರೆ. ಹೀಗಾಗಿ ಸಹೃದಯಿ ದಾನಿಗಳು ಮನೆಯ ದುರಸ್ತಿಗೆ ನೆರವು ನೀಡುವ ಕಾರ್ಯ ಮಾಡಬೇಕಿದೆ.