Friday, October 27, 2023

ಬಂದಿಯಾಗಿಹ ರವಿ

Must read

ಉದಯಿಸುವ ರವಿಯ ದಿನದೋಟಕೆ
ಅಡ್ಡಿಯಾಗಿದೆ ಕುರಿಮೋಡ ಕರಿಸಾಲು
ಕುರಿಗಾರ ಪವನನೆದ್ದು ಬರುವನಕ
ಹಿಂಡು ಕುರಿಗಳ ನಡುವೆ ರವಿ ಕಂಗಾಲು

ಮಳೆಗಾಲದೀಗಿನೀ ಹಗಲ ಹೊತ್ತು
ಮೋಡಗಳದು ನಿಲದ ನಿತ್ಯ ರಂಪಾಟ
ಕೆಂಪಾದವನಿಗದೇನೋ ಮಮಕಾರ
ಮೋಡಗಳೊಂದಿಗವನದೂ ತುಂಟಾಟ

ಶುಕಪಿಕಗಳ ಇನಿದನಿಯ ಗಾಢಮೌನ
ಮಂಕಾದ ಮನಗಳಲಿ ಗೌಣ ಸೊಗಸು
ಅವನೆದ್ದರೆ ಬೆಳಗು ಏಳುವರು ಎಲ್ಲ
ಹೊದಿಕೆಯಡಿಯಲೆ ಕಾಣುವರು ಕನಸು

ಸುರಿವ ವರುಣನ ನಡುವೆ ನೆಲದ ಗಾನ
ಝರಿ ತೊರೆ ನದಿಗಳಲಿ ರಭಸದೋಟ
ತಡೆವರಾರಿಲ್ಲ ತಿಮಿರದಾಲಿಂಗನವ
ಮೋಡಗಳಡಿಯೆ ರವಿಯ ಮಿಲನ ಕೂಟ

ಕಡಲಿನೊಡಲಿಗದೇನೋ ಸಡಗರ
ರವಿಯ ಚುಂಬನವು ಮರೆತ ಗೀತ
ಅಮ್ಮನೊಡಲಲಿ ನದಿಗೆ ಧನ್ಯ ಭಾವ
ಕಡಲ ಕುಡಿಗಳಲದೋ ನವ ಸಂಗೀತ

ನೀ.ಶ್ರೀಶೈಲ ಹುಲ್ಲೂರು

More articles

Latest article