ಬೆನ್ನಿಗಂಟಿದ ಕೊಳೆಯ ತಿರುತಿರುಗಿ
ತಿಕ್ಕೋದೇ ಆಯ್ತು ! ನೋಡಿದವರೆಲ್ಲ ಹೇಳಿದರೂ ನಂಬಲಾಗುತ್ತಿಲ್ಲ!
ಇನ್ನೂ
ಇದೆಯಂತೆ ಕೊಳೆ!
*****
ಕಾಣುವ ತವಕವ
ಕದಿವ ಮನಕದಾರು
ಮೂಗುದಾರ ಹಾಕುವರು?
ಸಿಗುವ ಸುಖವ
ತೂರುವ ತನುವಿಗದಾರು
ಬಿಡದೆ ತೇಕುವರು?
*****
ಅಡ್ಡಡ್ಡ ಬರುವವರನೆಲ್ಲ ಉದ್ದುದ್ದ ಸೀಳುವ ತವಕ!
ತಾನೇ ಅಡ್ಡ ಬಂದಾಗ ಉದ್ದುದ್ದ ಸೀಳಬೇಕೆನ್ನುವವರ ನೋಡಿ ಕುಹಕ!
*****
ಅವನ ಇರಿಯಲು
ತೆಗೆದುಕೊಂಡ ಚೂರಿ
ತನ್ನೆಡೆಗೇ ದುರುಗುಟ್ಟಿ
ನೋಡಿದಾಗ
ಉದಯಿಸಿತು ಪಲಾಯನವಾದ!
*****
ಕಾಡುವ ಮನದ
ಹಿಂದೆ ಅವಿತ
ಮೋಡಗಳ ಲೆಕ್ಕ ಹಾಕುತಿರುವೆ
*****
ಭರವಸೆಯ ಬೆಳಕೊಂದು
ಉಷೆಯ ಕಿರಣದಲಿಹುದು
ಅರಿತ ಮನಸ ಮಾತಿಗೆ
ಗೆಲುವು ಜಗದೊಳಿಹುದು
*****
ಅವನ ಕೈ
ಇವನ ಕಿಸೇದಾಗ ಇವನ ಕೈ
ಅವನ ಕಿಸೇದಾಗ ! ಓಟ್ ಹಾಕೋ
ನಮ್ಮಜನ ಮಾತ್ರ ಯಾವಾಗಲೂ
ನಿಶೇದಾಗ!
*****
ನೀ ಬಿತ್ತಿದ
ಬೀಜದತ್ತಲೇ
ಎಲ್ಲರ ಬೊಟ್ಟು!
ನಿರುಪದ್ರವಿ ಈ
ಬುವಿಯ ಮೇಲೆ
ನಿನಗೇಕೆ ಸಿಟ್ಟು?

*****
ತೆರೆಗಳು
ಉಕ್ಕುವಾಗಲೆಲ್ಲ
ತೆರೆದುಕೊಂಡು
ತೆಕ್ಕೆಗರೆವ ಅಂಬುಧಿಯ
ಆಳದ ಬೆಂಕಿಯ
ಅಳೆದವರುಂಟೆ?
*****
ಬೆತ್ತಲೆ ಜಗಕೆ
ಕತ್ತಲೆಯೇ ಬೇಕು!
ಕತ್ತಲೆ ಬೆಳಕಿನ
ಕತ್ತೊತ್ತಲೇ ಬೇಕು!!

 

#ನೀ.ಶ್ರೀಶೈಲ ಹುಲ್ಲೂರು
ಮಂದಹಾಸ ಬಸವೇಶ್ವರ ವೃತ್ತ
ಜಮಖಂಡಿ – 587301

LEAVE A REPLY

 Click this button or press Ctrl+G to toggle between Kannada and English

Please enter your comment!
Please enter your name here